शिक्षकांचे किस्से: प्रणाली देशमुख, पिंपरी चिंचवड

मी प्रणाली देशमुख पिंपरी चिंचवड महानगरपालिकेच्या, काळेवडी कन्या शाळेतील शिक्षिका. मी इयत्ता पहिलीच्या वर्गाला शिकवते. मी बारावीला असताना ‘बालमानसशास्त्र’ हा विषय घेतल्यामुळे मुलांचे मानसशास्त्र जाणून घेण्याची आवड व जिज्ञासा मला निर्माण झाली. या जिज्ञासेमुळेच मी शिक्षण क्षेत्र निवडले आणि मुलांचे मन, मेंदू आणि शिक्षण यांचा जवळून अभ्यास करण्यासाठी मी शिक्षक होण्याचे ठरविले.

माझ्यामते शिक्षणाचा हेतू ‘शाश्वत जीवन विकास’ आहे. या हेतूने माझ्या हातून एक पिढी घडावी, सुरक्षित, सुसंस्कृत, देशप्रेमी व प्रामाणिक नागरिक तयार व्हावेत. आपल्या देशाच्या विकासासाठी योगदान देणारे शास्त्रज्ञ तयार व्हावेत असे वाटते म्हणून मला शिकवायला आवडते.

मुलांचे जडण-घडण होतांना त्यांना प्रत्येक टप्यावर योग्य मार्ग दाखविण्याचा आनंद काही वेगळाच असतो. निरागस मुलांच्या सानिध्यात मन नेहमी प्रसन्न राहते म्हणून मला हे क्षेत्र आवडते.